Smáfuglarnir hafa fylgst með málum í Bandaríkjunum í dag þegar viðskipti hefjast með hlutabréf í Facebook Inc. sem rekur samnefndan vef. Búist er við því að fyrirtækið verði metið á 104 milljarða bandaríkjadala og þar með verðmætasta fyrirtæki Bandaríkjanna við skráningu.

FacebookMark Zuckerberg stofnaði Facebook. Hann þarf ekki að óttast ágengd íslenskra fjárfesta.

Ísland er eina landið í vesturheimi þar sem vinstristjórn bannar einstaklingum að fjárfesta í erlendum hlutabréfum. Slík viðskipti eru bönnuð með lögum eins og segir í 5 gr. reglna um gjaldeyrismál:

Fjárfesting í verðbréfum, hlutdeildarskírteinum verðbréfa- og fjárfestingarsjóða, peningamark-aðsskjölum eða öðrum framseljanlegum fjármálagerningum útgefnum í erlendum gjaldeyri er óheimil.

Íslendingar geta því ekki nýtt góð tækifæri erlendis eða tekið þátt í þeim fyrirtækjum sem þeir tengjast utan landsins. Íslendingar geta ekki tekið þátt í frumskráningu Facebook frekar en nokkru öðru erlendu fyrirtæki.

Smáfuglarnir hafa undanfarna daga séð hvern vinstrimanninn á fætur öðrum kalla misnotkun að þeim sem komið hafa fram í auglýsingum fyrirtækja og sveitarfélaga um land allt gegn aðför vinstristjórnarinnar að sjávarútveg. Segja þeir jafnan að verið sé að misnota fólkið sem fram kemur og að þetta séu auglýsingar af verstu sort.

RithöfundasambandiðIllugi Jökulsson nær ekki upp í nef sér vegna auglýsinga sjávarbyggða. Sami Illugi hefur aldrie mótmælt ESB auglýsingum.

Eru þetta ekki sömu menn og hafa birt hér í öllum miðlum ESB auglýsingar þar sem óteljandi einstaklingar og fyrirtæki reyna að sannfæra samlanda sína um að grasið sé alltaf grænt í Evrópusambandinu sem um þessar mundir er við það að liðast í sundur?

Hvað með það fólk? Er það ekki fólk sem lætur undan þrýstingi „stórra aðila“ og „getur ekki annað en komið fram“ því að „stór aðili“ kostar birtinguna? Hræsnin er algjör hjá íslenskum vinstrimönnum sem tala niður til þess fólks sem starfar í sjávarútvegi um leið og þeir senda næstu heimagerðu ESB auglýsinguna upp í Efstaleiti til birtingar.

Samkvæmir eru þeir sjálfum sér!

Smáfuglarnir hafa oft látið orðið „atvinnuleitendur“ angra sig en með því er verið að gera atvinnuleysi þægilegra fyrir þá sem ekki hafa vinnu. Letin er gerð þægilegri og afsakanlegri. Er ekki sá sem er atvinnuleitandi samkvæmt orðsins hljóðan að vera að leita sér að vinnu?

MorgunblaðiðEfnahagsmál sökkva stöðugt dýpra undir stjórn Jóhönnu Sigurðardóttur. Bætur orðnar slíkar að fúlsað er við störfum.

Ekki virðist raunin vera sú á Suðurnesjum þar sem fimm sóttu um 11 auglýstar stöður á saumastofu Víkurprjóns. Engrar menntunar eða reynslu var krafist þó það væri ekki verra. Eigandi félagsins sagði við Víkurfréttir:

„Mikið atvinnuleysi er á svæðinu og þá sérstaklega á meðal kvenna. Viðbrögðin hafa valdið okkur gríðarlegum vonbrigðum. Ég átti von á því að um 30 manns myndu sækja um, maður spyr sig því hreinlega hvað sé eiginlega í gangi á Suðurnesjum, [...] Samkvæmt þessu er ekki að sjá að það sé mikið atvinnuleysi þarna,“ hafa Víkurfréttir eftir Ágústi.

Smáfuglarnir lesa í Vefþjóðviljanum athyglisverða staðreynd. Fréttastofa RÚV nefndi það ekki einu orði að forseti Íslands hafi borið fréttastofuna þungum sökum þess efnis að fréttastofan gangi erinda tiltekins frambjóðanda. Vefþjóðviljinn segir:

World Economic ForumÓlafur Ragnar Grímsson ber fréttastofu RÚV þungum sökum. Fréttastofan nefndi málið ekki í fréttum sínum.

Þessar ásakanir eru alvarlegar og sérstaklega fréttnæmt að sá, sem ber þær fram á hendur fréttastofu Ríkisútvarpsins, sé forseti Íslands. Það er ekki á hverjum degi sem þjóðhöfðingi segir fréttamenn ríkisfréttastofunnar misnota aðstöðu sína til að hafa áhrif á niðurstöður kosninga.

En einum fjölmiðli þótti þetta mál ekki fréttnæmt. Ríkisútvarpið sendi út fjölmarga fréttatíma í útvarpi í gær auk sjónvarpsfrétta klukkan sjö. Í engum af þessum fréttatímum var áheyreyndum sagt eitt orð um að forseti Íslands hefði borið fréttastofu Ríkisútvarpsins þungum sökum. Ekki eitt orð.