Borgarahreyfingin er klofin, í annars vegar þá sem telja að þinghópurinn eigi að  vera á einkaflippi í eigin umboði inni á þingi (fara eingöngu eftir eigin samvisku) og svo hins vegar þá sem vilja að þinghópurinn starfi með stjórn og grasrót þannig að hreyfingin sem heild fái rödd inni á alþingi. 

Byrjum á byrjuninni.

Eftir þrautalausa fundarsetu um samþykktir sem allir höfðu allt að því áráttukennda skoðun á, eins og gjarnan vill vera þegar hópur kverúlanta koma saman, gafst ég upp á að Samstaða,bandalag grasrótarhreyfinga, myndi nokkurn tímann koma einhverju framboði í gagnið. Þá hafði ég samband við Gunnar Sigurðsson félaga minn og bað hann um að hjálpa mér að koma einhverju á koppinn. Við settumst niður og ákváðum hverja við vildum á stofnfundinn og hverjir ættu að gegna hvaða stöðu. Við handvöldum fólk alls staðar að til að fá sem flestar grasrótarhreyfingar inn í þetta. Tókum vinnu lýðveldisbyltingarinnar með húð og hári, fléttuðum hugmyndum um efnahagsúrbætur frá Þór Saari og Lilju Móses inn í þetta og úr varð lítil en öflug stefnuskrá. 

Færslan hér á undan er úr stefnuyfirlýsingu Frjálsu hreyfingarinnar sem er Ítölsk grasrótarhreyfing sem starfar með það að markmiði að uppræta flokkspólitík. Mér skilst að þeir taki þátt í sveitastjórnar kosningum aðallega og eigi nokkra menn inni hér og þar um Ítalíu. Tilefni þess að ég birti þetta hér er einfaldlega að þessi texti lýsir ágætlega hvað Borgarahreyfingin lagði upp með í upphafi ferðar. Frjálsa hreyfingin hafði samband við okkur og vilja starfa með okkur, sem væri fínt ef ekki væri fyrir fasískan undirtón í niðurlagi stefnuyfirlýsingarinnar. En sá hluti stefnunnar sem ég birti hér að neðan er nokkuð góður.

Mikið er ég orðin leiður á möntrunni um að menn hafi ekki brotið nein lög þegar þeir eru gripnir með handlegginn upp að öxlum í kökuboxinu. Hér á ég að sjálfsögðu við viðbrögð Hreiðars Más við opinberun lánabókar Kaupthings. Það voru engin lög brotinn, voru þetta þá bara eðlileg viðskipti?

Lög eru ofmetin, lög eru tilraunir mannsins til að viðhalda einhverju réttlæti. Þess vegna er réttlæti lögum ofar, og ef menn þykjast geta falið siðleysið á bak við það að siðleysi og óréttlæti sé löglegt þá eru löginn ekki að þjóna tilgangi sínum. Þá á að semja ný lög sem fullnægja þeirri kröfu að réttlætinu sé fullnægt. Mér finnst samt hann Hreiðar ansi kaldrifjaður í þessari yfirlýsing sinni, vitandi það að vinir hans Lárus Welding, Tryggvi Þór Herbertsson, Ari Edwald og fleiri jöfrar í Viðskiptaráði Íslands eiga stóran hlut af Íslenskri viðskiptalöggjöf. Kannski er það þess vegna sem það að setja landið á hausinn sé löglegt en siðlaust.

Á Íslandi lána menn vinum sínum og sjálfum sér 1500 milljarða á ábyrgð Íslenskra skattgreiðenda. Löglegt?  -já...   Siðlaust? Maður spyr sig.

Það er að verða deginum ljósara að alla vega Hollendingar ætla sér að standa í vegi fyrir umsókn okkar til ESB ef ekki verður gengist við þessari ríkisábyrgð í Icesave málinu. Það verður þá bara að hafa það. Hótanir hafa alltaf farið einstaklega illa í mig og geri ég yfirleitt þvert á það sem beðið er um, til að ögra og vera með leiðindi. Hvernig líst mönnum annars á að gerast 51 stjarnan í bandaríska fánanum?

Ég las samninginn fyrr í vikunni. Ég skildi ekki helminginn, ég hef lesið fjöldann allan af bókum á ensku og tala málið eins og innfæddur, þannig að það var ekki vandamálið. Vandamálið var að hann er ekki á ensku, hann er á einhverju lagamáli sem aðeins lögfræðingar skilja. Hvernig er komið fyrir okkur eiginlega? Á miðöldum voru prestar að túlka orð guðs og kóngsins ofan í lýðinn og settu þeim lífsreglurnar. Þá kunni almenningur ekki að lesa og var það vel því að þá var lýðurinn háður klerkastéttinni. Nú kunna allir að lesa, þá er bara fundið eitthvað nýtt tungumál sem almenningur hefur takmarkaðan aðgang að til að viðhalda klerkastéttinni nú kalla þeir sig bara lögfræðingar.