Ýmsar fréttir birtust á síðustu dögum Gamla Íslands, sem skoða má í öðru ljósi eftir hrun. Hér á eftir fara nokkrar.

Viðskipti með mesta móti

Fréttir af markaði sem birtust í Morgunblaðinu 23. september, tveimur dögum áður en Glitnismenn héldu í Seðlabankann, eru ansi athyglisverðar:

ÚRVALSVÍSITALA Kauphallar OMX á Íslandi hækkaði um 3,21% og var lokagildi hennar 4.186,14 stig.

Exista hækkaði um 7,60%, Glitnir um 4,60% og Bakkavör um 4,22%. Gengi bréfa Alfesca lækkaði hins vegar um 0,44% í gær.

Velta á hlutabréfamarkaði var með mesta móti og nam tæpum 40,5 milljörðum. Mestu munaði þar um 29,3 milljarða króna viðskipti með bréf Kaupþings.

Velta var með mesta móti, þar af var 3/4 hluti veltunnar með bréf í Kaupþingi. Hver var það sem átti svo mikil viðskipti með Kaupþingsbréf þremur dögum áður en stjórn bankans tók ákvörðun um niðurfellingu ábyrgða starfsmanna á hlutabréfakaupum þeirra? Hverjir seldu? Hverjir keyptu?

Hvað vissi Davíð, og hvenær?

Mikið hefur verið rætt um það að óljóst sé hvað Davíð Oddsson seðlabankastjóri vissi fyrir fallið og misvísandi fullyrðingar Davíðs sjálfs hafa verið hraktar á ýmsum stöðum. Hann hefur ítrekað minnst á að hann hafi lengi varað við falli bankanna og meðal annars sagt að hann hafi varað ríkisstjórnina við í júní síðastliðnum með þeim orðum að 0% líkur séu á því að bankarnir lifi af.  Það er því einkar athyglivert að lesa eftirfarandi fréttabút úr Morgunblaðinu 19. september síðastliðinn (tengill í aðgangsstýrt gagnasafn MBL):

Segir sparifé Íslendinga tryggt

MENN mættu vera orðnir mjög aumir ef þeir myndu ekki tryggja það að íslenskir innistæðueigendur í bönkum hérlendis myndu ekki tapa sínum fjármunum, að sögn Davíðs Oddssonar, formanns bankastjórnar Seðlabanka Íslands. Í samtali í Íslandi í dag á Stöð 2 sagðist hann ekki sjá fyrir sér að það gæti gerst að sparifé Íslendingar væri ekki tryggt.

„Ég get ekki séð fyrir mér það ástand án þess að ég hafi rætt það við nokkurn mann, hvorki við ríkisstjórn né aðra. Ég get ekki séð fyrir mér það ástand að íslensk yfirvöld myndu ekki tryggja innlendar innistæður í bönkum. Því ef þú gerir það ekki þá ertu búinn að tapa niður vilja manna til að spara í næstu 20-30-40 árin.“

Hvað íslensku bankana varðar segir Davíð að þeir hafi staðið sig betur en margir spáðu. „Þó að maður vilji ekki hlakka yfir neinu þá voru það nú greinendur frá Lehman og Merrill Lynch sem töldu að bankarnir stæðu afar illa. Þessir bankar eru þó horfnir af sjónarsviðinu, en íslensku bankarnir standa enn.“

Davíð segir að þó megi ekki draga fjöður yfir það að núverandi ástand á mörkuðum sé afar erfitt íslensku bönkunum. „Þeir hafa þurft að sækja fjármagn á markaði og menn höfðu kannski búist við því að bankarnir þyrftu að þrauka í 5-6 mánuði. Menn höfðu vonast til þess að þetta lagaðist um síðustu áramót og svo hafa menn verið að búast við því að þetta lagaðist frá mánuði til mánaðar og alltaf þrauka bankarnir.“

Segir Davíð að ekki sé annað vitað en bankarnir geti tryggt sér fjármagn inn í framtíðina. Enginn vafi sé á því að þetta þrengi mjög þeirra hag eins og allra annarra banka. Áður hafi menn sagt að ástandið væri verra hér á landi en annars staðar, en nú sjái menn að það sé ekkert annað lögmál sem gildi um íslensku bankana en aðra banka. [leturbr. mínar]

Hvaða hluti af frásögnum hans ætli sé sannur?

Annars er mjög athyglisvert að strax þarna, 19. september er búið að afmarka það að fari bankarnir, þá verði það "íslenskir innstæðueigendur í bönkum hérlendis" sem verði varðir.

En samt var hann ekki búinn að ræða það við neinn?

Komst Bjöggi í kassann?

Kómískar fréttir geta snarlega breyst í háalvarleg mál þegar litið er á þær í baksýnisspeglinum. Eftirfarandi frétt sem Markaður Fréttablaðsins rifjar upp á gamlársdag var sett fram sem brandari þann 9. maí sl.:

Sveittur bankastjóri

Vegna misskilnings var Sigurjón Árnason, bankastjóri Landsbankans, spurður á uppgjörsfundi hvernig hann skýrði að lán til tengdra aðila hefðu hækkað að skilja mætti um tugi milljarða. Það kom í fyrstu á Sigurjón áður en ljóst var að um misskilning var að ræða og farið var að fletta í uppgjörspappírum til að athuga hvort mistök hefðu verið gerð við gerð reikninga. Þegar sannleikurinn kom í ljós; að ruglað hafði verið saman milljónum og milljörðum var bankastjóranum mikið létt. "Ég svitnaði bara og hélt að Bjöggi hefði komist í kassann og hirt allt," sagði Sigurjón og átti við Björgólf Guðmundsson, formann bankastjórnar. Uppskar hann hlátur fundarmanna.